Davao City – Gisuspende sa City Government of Davao ang confirmation passes sa pagkuha sa mga stranded persons ug returning residents.
Gibutyag ni Davao City Mayor Sara Duterte nga ilawom sa General Community Quarantine (GCQ), tugtan na ang pagsulod ug gawas sa dakbayan subay sa May 15, 2020 Inter-Agency Task Force for the Management of Emerging Infectious Diseases Omnibus Guidelines Sec. 7 (6) apan ang tanang mosulod sa land checkpoint, seaport ug airport sa Davao mopailawom sa health screening.
“Sa GCQ nakabutang allowed ang travel, wala man tay mabuhat ana, GCQ for any purpose other than leisure shall be permitted. Kada balik nimo muagi man gyod ka sa border pag kada agi nimo sa border i-health screening ka, kung mubagsak ka sa health screening ipadala ka namo didto sa SPMC, kung mupasar ka sa health screening musulod naka,” segun ni Mayor Sara.
Matud pa nga dili na kinahanglang i-quarantine ang mga trabahanteng gikan sa gawas sa Davao o mga short stay individuals apan ipailawom usab kini sa health screening.
Sa karon, gitugot ang pagsulod sa Davao gikan alas 8:00 sa buntag hangtod alas 4:00 sa hapon, Lunes hangtod Sabado tungod kay limitado lang ang qualified health personnel nga mohimo sa health screening ug gilauman ang taas nga linya sa checkpoints ug airport.
Dugang pahimangno sa lokal nga gobyerno nga likayan ang unnecessary travel sa Davao tungod sa nagkataas nga COVID-19 confirmed cases.
RadyoMaN Aimee Guinita
