Dayon ang paghiwat sang hearing sang korte angut sa expropriation case nga ginpasaka sang MORE Power Corporation agud ma-acquire ang mga assets sang Panay Electric Company ukon PECO.
Sa ginpaguwa nga order ni Judge Mary Evette Go sang RTC Branch 37 nga napetsahan Mayo 24, 2019, ginbasura sini ang Motion For Reconsideration sang PECO nga nagahingyo nga suspendiron ang pagpatigayon sang hearing sa nasambit nga kaso.
Suno kay Atty. Hector Teodosio, legal Counsel sang MORE Power nga magluwas sa pagbasura sang motion sang PECO, ginhatagan pagtamod sang korte nga nakabayad na ang MORE sang deposito nga 481,842,450 pesos nga katumbas sang assessed value sang mga assets sang PECO.
Nasaad sa nasambit nga order nga dapat padayunon ang hearing sang kaso bangud may kaangtanan ini sa Elektrisidad nga isa ka necessity kag may vested public interest.
Ginakabig naman sang More Power corporation nga kadalag-an ang nasambit nga order sang korte.
