El City Fire Marshall F/Supt Jhufel Brananola ya man junta con el mga contratista aqui na ciudad de Zamboanga recientamente. Este para informa con el concerne el mga nuevo poliza ele hay impone bajo na su presente liderato, enconneccion na preparasyon del plano y plantada del mga nuevo edefiio aqui na ciudad, que cumbiene sigui con el mandato del ley. Si Brananola ya pidi con el mga contratista para sigui con el mga reglamento del “Fire Code” que donde necesita na preparasyon pa lang del plano, cumbiene “Fire Code compliant” ya el tal edeficio que hay planta privado man o de govierno. Base na su observacion, si Brananola ya habla cay chene del mga edeficio donde sila aura ya conduci el inspeccion el hinde ta cumpli con el reglamento, y necesita coreji imedietamente antes pa man chene trahedya que hay socede. Apelo del mga contratista con el nuevo hefe de bumbero para dale canila el mga reglamento que deve sila sigui y cumpli. Ya asegura tambien sila que hay coopera sila con el presente liderato para chene el mas librao na peligro mga edeficio na ciudad de Zamboanga. Si Brananola ya habla cay bien grande ayuda para na mga bumbero el aseguramiento que ya dale el mga contratista para esta lejos na mga insendio de quema el diila mga proyecto. – Bhong Simbajon/RMN News
