MANILA, Philippines – Nadalahig ang pangalan sang weightlifter nga si Hidilyn Diaz kag morning show host nga si Gretchen Ho sa mga bag-o nga personalidad nga ginapatihan may kahilabtanan sa black propaganda batuk kay Pangulong Rodrigo Duterte.
Sa presentation ni Presidential spokesperson Salvador Panelo kagapon sang hapon, Mayo 8, gin-link sanday Diaz kag Ho sa webmaster nga si Rodel Jayme, nga gina-akusar sa pagpalapta sang “Ang Totoong Narco-list” videos.
Suno kay Panelo, may “online collaboration” ang duha ka mga personalidad kay Jayme. Ginkadlawan naman ni Diaz ang nasambit nga isyu.
“Sino si Rodel Jayme? Hahaha di ko po kilala. Lol nakakatawa naman,” pahayag ni Diaz.
Dugang pa ni Diaz sa isa ka tweet: “Dami ko pang goals sa life and Pinas para sumali sa ganyan bagay. Nashock lang ko nalink ako sa ganyan.”
Sa isa man ka tweet ginsiling ni Ho nga indi niya kilala si Jayme kag wala man ini sang ihibalo sa mga viral videos.
Martes, Mayo 7 sang gab-i, nagtambong si Ho sa isa ka dinner nga gin-host sang Malacañang. /IFM NEWSROOM/RCSG
