BACOLOD CITY – Nagpadala sang sulat si Asian Games gold medalist Hidilyn Diaz sa Philippine Sports Commission, PSC angot sa iya pagka-dismaya sa mga opisyales sang Philippine Weightlifting Association particular kay anay Bacolod City Mayor Monico Puentevella.
Suno kay Diaz wala niya nagustuhan ang pamalakat ni Puentevella bilang presidente sang Philippine Weightlifting Association bangud wala sang promotion, wala sang sports expansion kag wala man strategic plans.
Dismayado si Diaz bangud sa idalum sang liderato ni Puentevella wala sang may nadihon nga long term program para sa mga atleta kag ang pinaka-nalainan paniya sini amo nga wala sang integridad ang iya liderato.
Ginapangabay ni Diaz ang pagbiya ni Puentevella sa pwesto kon indi na sini masarangan ang pagka-presidente sang asosasyon.
Iya ginaduso nga ang pagpili sa mabulos nga lider sang Philippine Weightlifting Association ang dapat ipaagi sa ensakto nga proseso kaangay sang eleksyon.
Bangud sini, ginaduso ni Diaz nga magpatigayon na lamang sang eleksyon ang Philippine Weightlifing Association.
Sa karon wala pa sang komento si Puentevella sa isyu. /Mayor Monico and Hidilyn during the 2016 Olympics
