Maayos at walang naging problema ang ginawang aktibidad ng mga kapatid nating Muslim sa Eid’L Fitr na tanda ng pagtatapos ng Ramadan.
Alas-7:00 ng umaga nang ikasa ang panalangin para sa Eid’l Fitr kung saan nasa halos 4,000 Muslim ang nakibahagi sa Golden Mosque sa Quaipo, Maynila.
Pumalo naman sa halos 10,000 ang bilang ng mga Muslim na nagtungo sa Quirino Grandstand na nagsagawa rin ng kaparehas na aktibidad.
Nagpasalamat naman ang pamunuan ng Manila Police District (MPD) sa pakikisama ng bawat isa kung kaya’t walang naitalang anumang hindi inaasahang insidente.
Matapos ang panalangin ay may kani-kaniyang selebrasyon sa bawat tahanan at komunidad ang mga Muslim habang patuloy na naka-monitor ang MPD para mapanatili ang seguridad at kaayusan.
