Umabot sa 45,849 ang bilang ng mga pasahero na bumiyahe sa iba’t ibang pantalan sa bansa simula alas-6:00 kagabi hanggang alas-12:00 ng madaling araw.
Base sa datos ng Philippine Coast Guard o PCG bilang bahagi ng Oplan Biyaheng Ayos: Pasko 2019 pinakaraming pasaherong bumiyahe ay sa Central Visayas na nasa 10,981 ang bilang.
Sinundan ito ng Western Visayas na nasa 9,799; Southern Tagalog – 7,191; Northern Mindanao – 6,533; Eastern Visayas – 3,540; Southern Visayas – 2,716 at National Capital Region na nasa 1,442 ang bilang.
Sa kabila nito, patuloy na nagbabantay ang coast guard upang masiguro ang zero maritime casualty o incident ngayong Kapaskuhan.
Pinaalalahanan din nila ang publiko na maagang magtungo sa mga pantalan para hindi maghintay ng matagal sa security check at patuloy na maging alerto at i-report sa mga otoridad sakaling may kahina-hinalang tao o bagay na makikita.
