Ibinasura ng korte sa Quezon City ang hiling ng kumpanyang NOW Cable Inc. na magpalabas ng writ of preliminary injunction laban sa ipinalabas na cease and desist order ng National Telecommunications Commission (NTC).
Ang petisyon ng Now Cable sa Quezon City Regional Trial Court ay layong kuwestyunin ang NTC Order na ipinalabas noong Sept. 2021 na nag-iisyu ng cease and desist order laban sa NOW Cable matapos mapaso ang prangkisa nito.
Noong May 2022, binawi na ng NTC ang mga naka-assign na frequency sa NOW Cable kabilang ang lahat ng channel at maging ang inisyung provisional authorities dito dahil sa kawalan ng balidong Congressional Franchise.
Sa resolusyon ng QC RTC Branch 91, sinabi nitong nabigo ang NOW Cable na patunayan na dapat silang mabigyang proteksyon sa pamamagitan ng pagpapalabas ng injunction.
Ayon sa korte, sa ilalim ng RA No. 8213 Section 3, kailangan ng prior approval ng NTC para sa kontruksyon at operasyon ng ng istasyon at pasilidad ng NOW Cable.
Sinabi din ng korte na ang prangkisa ng NOW Cable ay napaso na noong Sept. 2021.
Sa naging opposition ng NTC, sinabi nitong walang otorisasyon ang korte para aprubahan ang petisyon ng NOW Cable dahil ang pagbibigay ng certificate of authority para makapag-operate ng radio at television broadcasting system kabilang na ang CATV ay mandato ng NTC.
