Davao City – Dili na maitsura ang usa Hilux Toyota human mibangga sa crane tower sa tunga sa tulay sa kanto sa Jade Valley, Buhangin ning siyudad ala 1:00 kaganinang kadlawon.
Gumikan sa kakusog sa impact, perting lutuka sa atubangan sa sakyanan nga gikamatay sa driver nga si Breath Beejay Buenaflor, 23 anyos, ulitawo ug nanimuyo sa Palm Drive, Buhangin ning dakbayan.
Sa inisyal nga imbestigasyon sa traffic section sa Buhangin PNP nga gikan sa Kilometer 5 ang biktima ug mupaingon unta sa Maa.
Sumala ni Rolando Hugo, PUJ driver, nga paspas kaayo ang dagan sa behikulo dihang nag-overtake kini ug nag-counter flow mao nga midiretso og kabangga sa crane tower nga gikamatay sa biktima.
Ang kapulisan sa Buhangin PNP, misilip sa anggulo nga nag-suicide ang batan-on kinsa nakasinati og depresyon ug gikuha ang susi sa Hilux nga wala mananghid sa iyang mga ginikanan.
Ang patay’ng lawas sa biktima anaa na karon gihatod sa Angel Funeral Parlor sa may dalang Torres ning dakbayan.
RadyoMaN Joel Viray
