Davao City – Ugmang adlawa na usab ang paghinumdom sa mga minahal nato sa kinabuhi nga mipanaw na sa laing kalibutan, kini ang adlaw aron sila hinumdomon sulod sa usa ka tuig.
Sumala sa Youth for Peace for Mindanao chairperson Keneth Tagaroo, base sa pagtoo sa Romano Katoliko kini ang panahon sa pagbisita kanila pinaagi sa paghikay aron dalhon ug ihalad kanila. Kini usab ang higayon aron magtapok ang mga sakop sa pamilya pinaagi sa pag-uli sa ilang mga probinsya aron mobisita sa mga minatay.
Giingon ni Tagaroo, sama sa naandan ang ilang ginahimong pagpangandam pinaagi sa pagluto’g pagkaon usa na niini ang biko, pagpalit og bulak, pagdagkot og kandila aron maghalad ug pag-ampo sa mga kalag.
Giklaro usab ni Tagaroo, lahi na karon ang pagselebrar sa Kalag-kalag tungod kay naapektohan sa modernisasyon tungod sa mga bag-ong kahimanan pinaagi sa pagsaba-saba sa sementeryo dili sama kaniadto nga himoong balaan ang maong okasyon pinaagi sa pag-ampo inubanan sa mga paghalad sa gilutong mga pagkaon.
Tungod niini duna siyay panawagan ilabina sa mga kabatan-onan kabahin sa paghanduraw sa mga mitaliwan na sa laing kalibutan.
RayoMaN Bernard Pantallon
