ROXAS CITY, CAPIZ – Ginkumpirmar ni DepEd Capiz Division Supt. Roel Bermejo nga mas mangin temprano ang christmas break sang mga estudyante subong nga Disyembre.
Ini ang base sa DepEd Order No. 049 series of 2018 nga ginpapanaog ni Secretary Leonor Briones, kun sa diin sa baylo nga sa Disyembre 22, 2018, ginhimo nga Disyembre 15, 2018 ang Christmas break sang mga kabataan.
Suno diri nga katuyoan sang amo nga direktiba nga mahatagan sang quality time ang mga kabataan kag pamilya nga ma-enjoy ang Christmas season.
Samtang magaresume naman ang klase sa maabot nga Enero 2, 2019 kag Abril 5, 2019 man sa gihapon ang last day sang klase sa school year 2018-2019.
May kaangut sini, ginpahanumdom ni Bermejo sa tanan nga mga manunudlo kag mga school heads nga dapat i-selebrar sa simple nga pamaagi ang christmas party sa mga boluthuan.
Base sa ginpapanaog nga memoradum sang DepEd, wala dapat sang alamotan apang nagadepende naman ini sa kasugtanan sang mga ginikanan kun sa diin gina-enganyo man ang mga ini nga makigbahin sa christmas party sang mga kabataan.
Suno diri, wala man nagakahulogan nga may yara gid sang kontribusyon kundi boluntaryo gid lamang kag dapat may pahanugot sa mga ginikanan.
