TACLOBAN CITY – Waray pa man opisyal nga desisyon an Korte Suprema kun babalyuan na ba an Board of Directors han Leyte Metropolitan Water District o kun LMWD, nag-courtesy call na kakulop ha LMWD an mga gin-appoint ni Tacloban City Mayor Cristina Romualdez kumo mga Board of Directors.
Hira Atty. Sharilee Gaspay Mauro, Atty. Jenny lyn Manibay, Engr. Bobby Munoz, Bernadita Valenzuela ngan Atty. Butch Corpin.
Sumala kan Engr. Munoz, hira in nag-courtesy call para mahibaruan han mga opisyal han LMWD nga hira an gintudlok ni Mayor Romualdez kumo bag-o nga Board of Directors.
Ha eksklusibo naman nga interview han RMN kan LMWD General Manager Pastor Homeres, kun ano an magiging desisyon han Korte Suprema ngan Local Utility Water Administration o kun LUWA, in iya daw ini rerespituhon.
Waray naman liwat daw naging problema ha nalingkod pa yana nga mga Board of Directors han probinsya han Leyte nga gin-appoint ni Leyte Governor Dominic Petilla tungod nga ira na ini napag-istoryahan.
“Napag-istoryahan na namon ini with the existing board of directors nga if ever there is a ruling already then we have to respect that. An gin-aaro ko manla han board didi ha City is the documents nga hira na gud talaga an opisyal nga board of directors.”
Aminado naman hi General Manager Homeres nga waray hiya mahihimo kun ano man an magiging desisyon tungod nga politikado ini nga ahensya han pagtaga-tubig.
