Davao City – Alang kang outgoing Magdalo Partylist Representative Gary Alejano, usa ka dakung sayop ang pakigsuod sa gobyerno sa Pilipinas ngadto sa China kung ang basehan mao ang kabalaka nga basin musangko sa giyera ang isyu sa West Philippine Sea ug mapagan unya ang 110 milyon ka mga Pilipino ugaling mag-ulbo ang kagubot.
Matud ni Alejano, dagha’g opsiyon sa pagsulbad sa bangi sa West Philippine Sea apan malikayan ang kagubot ug dili masakripisyo ang interes ug seguridad sa nasud sama pananglitan sa diplomasiya nga pamaagi karon nga importante kaayo ang Pilipinas sa China.
Walay dautan nga makighigala sa China basta dili lamang mulabaw ang ekonomikanhong kaayohan sa soberanya ug interes sa nasud nga maoy numero unong mandato sa kagamhanan nga panalipdan ang Exclusive Economic Zone kun EEZ sa Pilipinas butang nga wala mahimo sa administrasyon, dugang ni Alejano.
Segun sa magbabalaud, gikinahanglang mulabaw ang national interest ug tindugan sa gobyerno ang iyang foreign policy aron ang national interest sa America ug China dili mosalir sa teritoryo nga iya sa Pilipinas nga sa pagkakaron, 80% sa EEZ sa West Philippine Sea giangkon na sa Beijing.
Gipa-hinayhinay ni Alejano si Pres. Rodrigo Duterte sa pagdawat sa wala’g tuo nga pautang ug pagpasulod sa mga kumpanya nga gikan sa China kay basin unya og muabot ang panahon nga mabutang na sa kakuyaw ug ma-trap na ang Pilipinas kansang epekto dili lamang sa termino sa presenteng gobyerno apan hangtud sa sunod pa nga mga administrasyon.
Busa, pabor ang last-termer congressman sa panawagan sa uban nga isa-publiko ang gisudlan nga mga kasabutan tali sa Chinese government ug Philippine government aron mahibawo ang katawhan sa unod niini.
RadyoMaN Joel Viray
