HINUBOG | Mag-utod, pilason matapos nga ginlabo sa Linateran Panay!

Panay, Capiz- Pilason ang duha ka mag-utod matapos ginpanglabo ala 1:30 sang hapon sa Brgy. Linateran, Panay, Capiz.
Ginkilala ang mga biktima nga amu sanday Arnel Boleño y Aquino, 48-anyos kag Alfredo Boleño Jr. y Aquino nga lunsay residente sang nasambitan nga lugar.
Ang mga ini ang nag-angkon sang nagkatuhay nga kapilasan sa lawas matapos nga ginlabo sang ginatudlo suspek nga si Vicente Bechayda y Bernales alias “Bingkit”,36-anyos ang pang-edaron.
Nagaguha sa imbestigasyon sang mga kapulisan nga upod lamang nga naga-inom ang mga ini sa poluy-an nanday Alfredo Boleño sang nagluntad ang baylunahay sang mga mainit nga komento sa tunga sang mga ini.
Nag-uli ang suspek kag sang pagbalik sini, ini na ang may yara sang dala nga duha ka mga sanduko kag hinali ginpanglabo ang mga biktima.
Una gindala ang mga ini sa RHU sang Panay apang ginpakamaayo nga i-refer sa Roxas Memorial Provincial Hospital para sa dugang nga pagbulong.
Boluntaryo naman nga nagsurrender sa mga otoridad ang suspek nga si Bechayda.
Hinubog ang ginatudlo nga motibo sang krimen.

Facebook Comments