Davao City- Patay na nakit-an sa mga kaubanan ang usa ka welder sulod sa gitukod nga building sa Km 10, Sasa ning siyudad.
Nagbuy-od ug wala nay kinabuhi nakaplagan si Michael Ramos, 33 anyos, minyo, welder ug taga-Bukidnon sa iyang kaubanan nga si Eleazar Arante sa building nga gitukod.
Adunay samad sa ulo ang biktima nga posible rason sa kamatayon sa na-ulahi.
Nasuta sa imbestigasyon ni SPO1 Dante Bais sa Sasa PNP nga alas 10:30 sa buntag nananghid ang biktima nga mosaka sa laing andana aron kuhaon ang welding machine.
Apan miabot na lang og pila oras wala na makanaog ang biktima busa gisaka na kini sa iyang mga kaubanan.
Gidala na sa Angel Funeral Parlor sa dalang Torres alang sa otopsiya aron masayran ang hinungdan sa kamatayon sa biktima.
RadyoMan Joel Viray
