Davao City – Gitoohang road rage ang hinungdan sa vehicular accident nga nahitabo alas-11:00 ang takna sa buntag kagahapong adlawa diha sa may C.P. Garcia highway partikularmente sa may Maa road kun diin nag-abot ang truck sa CENRO ug laing truck nga kargado’g balas nga gi-kontrata sa taga-DPWH diin usa sa mga driver niini dead on the spot tungod sa pagka ipit sa ulo.
Biktima naila nga si Archie Amimita Cerro, hamtong ang pangedaron ug residente sa Km. 5 Matina Pangi ning siyudad nga maoy driver sa CENRO.
Base sa report nga gipanubayan ni PO1 Banug sa Talomo sub police station sa Brgy. Maa, gikan pa sa Buhangin ug padulong southbound ang CENRO truck aron maglabay og basura apan adunay nakalalis ang bitima nga lain pang truck tungod nasaghiran lang diyutay ang side mirror niini.
Gumikan niini nahitabo ang ginukoray ug nahiabot kini ngadto sa may C.P. Garcia highway diin nag ekis-ekis matud pa ang biktima.
Sa pag overtake niini sa mga sakyanan, midiretso kini sa lubot sa Isuzu dump truck nga gimaneho usab ni Mike Mancia Moquinto diin sa kakusog sa impact naipit kini ug naka angkon og grabeng samad sa ulo hinungdan sa iyang kamatayon.
Sa kasamtangang, balhog na sa bilanggoan sa Talomo PNP ang suspek samtang ang kabanay sa biktima gi-abisohan sa kapolisan nga mag file og kaso batok ngadto kang Moquinto.
RadyoMaN Paul Canono
