Roxas City, Capiz – Makabig nga “historic” para sa basketball team sang secondary boys ang kadalag-an sang mga ini kontra sa Negros Occidental sa WVRAA 2019.
Ini matapos nga nakuha sang Capiz Golden Warriors ang kampeonato kontra sa karibal nga Negros Occidental Team sa gold medal round match nga ginpatigayon sa Capiz Gymnasium, Villareal Stadium pinaage sa skor nga 77 – 63.
Sa pag-umpisa pa lamang sang 1st quarter nangin mainit na ang opensa nga ginpakita sang Capiz cagers kag wala na ginbalikid pa ang kasumpong.
Hugot man ang depensa nga ila ginpakita sa pambato sang Negros Occidental kabangdanan nga nangin madali para sa ila nga maka-abanse.
Ang nangin kadalag-an sang Capiz team ang nagtapos sa kapin sa 57- year drought sa championship sa Basketball Secondary Boys sa WVRAA Meet.
Nahibaloan nga ulihi nakuha sang Capiz ang gold medal sa basketball boys sadtong tuig 1962.
Nangin talatupangdon naman ang suporta sang mga Capizeño sa ila pambato sa diin puno ang venue samtang ginkadismaya naman sang iban nga mga tumalan-aw matapos ang mga ini ang napaslawan nga makasulod sa Capiz Gym.
Samtang bangud sa nasambitan nga kadalag-an, ang Capiz amo na ang magarepresentar para sa Western Visayas sa Palarong Pambansa nga igapatigayon sa Davao City sa maabot nga Abril 27 tubtob Mayo 4, 2019.
photo (c)- CANC tags:Visayas,Roxas,DYVR,DYVR657,Capiz,WVRAA 2019,Vilareal Stadium,Golden Warriors,Palarong Pambansa
