TACLOBAN CITY – One way scheme na iton ruta ha Syudad han Tacloban ini man gud an nakit-an nga solusyon han Tacloban City Government para diri magbugi-ot iton trapiko ha syudad.
Pero dida han dominggo alas 2:00 hiton kulop, mayada usa nga nagda drive hiton kotse nga diri ada hiya maaram hiton iya ginbabaybay nga kalsada.
Ginkilala an mao nga nagda drive nga hi Rolando Hidalgo, 64 anyos, opisyal han Tacloban City Hall, ngan residente ha Brgy. 43-A Quarry han Tacloban.
Subay han nakuha han RMN nga impormasyon ha Tacloban City Police Office, hi Hidalgo in ginbabaybay niya an kadalanan han Sto. Nino St., nagpa tu-o hiya hinungdan han opposite direction ha may Avenida Veteranos St. Pag abot ha kadalanan han St. Pauls Hospital didto niya nakabunggo an usa liwat nga kotse nga gintatag-iyahan ni Fatima Villasin nga taga Tacloban. Minimal vehicular accident an nahinabo.
Sumala han tagapagyakan han Tacloban PNP nga hi PCInsp. Rex Cantillep, nakainom hin mahurubog nga irimnon hi Hidalgo hadto nga mga oras.
“Base ha report han aton traffic enforcer, apparently smelling liquor hiya.”
Magpapasaka naman an Tacloban PNP hin resisting arrest complaint kontra kan Hidalgo kay hadto nga mga takna nagpakita hin ‘disobedience’ hi Hidalgo ha romesponde nga pulisya ha nasabi nga insidente.
“Nagkamayada disobedience han order han aton mga (pnp personnel) at that moment, as the time goes by nagkalma man hiya ngan umupod hiya ngadi ha opisina.” Pahayag ni Cantillep.
Nagkasarabot naman hira Villasin kun ano an responsabilidad ni Hidalgo sugad han damages durot han vihicular accident.
Ginkadto naman han RMN News team an opisina ni Hidalgo ha City Hall pero waray ini magpaunlak ha amon hin interview.
