Matud sa kandidata sa Hiyas sa Kadayawan 2023 gikan sa tribong Matigsalug nga si Angelie Benito, dili usab basta-basta mahitabo ang usaka ‘pangayaw’ sanglit muagi kini sa makuting proseso ug hiniusang desisyon sa mga kadagkuan sa tribu isip pagtinguha og hustisya sa insidenteng giilugan og asawa, mga krimeng pagpatay sa agrabyadong pamilya, pagpanlugos ug uban pang mga panghitabo.
Mapasalamaton si Benito gumikan hapsay ang ilang komunidad ug nga walay ‘pangayaw’ nga nahitabo.
Hinoon, gibati og kasubo si Benito sa kamatayon sa lider sa Barangay Baganihan nga si Datu Ernesto Linog Matalam, Indigenous Peoples Mandatory Representative (IPMR) ug Kagawad Joel Daguinsal Siawan.
Matud ni Benito, gitugyan na lamang nila karon sa kamot sa mga tinugyanan sa balaud ang pagresolba sa ngilngig nga krimen ingon man ang pagkab-ot sa hustisya.
Giklaro usab niini nga dili ‘pangayaw’ ang nahitabong komosyon sa Barangay Lacson, Calinan District diin gitigbas-patay ang duha ka mga pulis sa duha ka mga suspect kinsa kaanib sa Matigsalug tribe.
Gibutyag sa kandidata nga ang ilang tribu mga peace loving people ug dili usab sila angay’ng kahadlukan.
RadyoMaN Aimee Guinita
