Report ni: Tita Jen Palomo Debaja
Arestado sa follow up operation ang isa ka “notorious swindler” sa NAIA matapos ginkawatan sang P270,000 pesos kag $10,000 Hong Kong dollars ang isa ka OFW halin sa HK sang Miyerkules, Nobyembre 14, 2018.
Base sa panaysayon sang biktima nga si Gemelie Martin, nag palapit sa iya ang suspetsado samtang nagahulat sang iya connecting flight pa Tuguegarao. Sa indi mahangpan nga hitabo, nakumbinsi sang suspek si Martin nga mag withdraw sang kwarta sa ATM machine sang BDO sa sulod sang terminal 3.
Dugang pa ni Martin, ginbilin sini ang iya bag kag bagahe sa suspek agud maggamit sang comfort room kag sa iya pagbalik, nangindulaan na ang suspek dala ang iya bag nga may cash kag importante nga dokumento pati ang iya mga bagahe.
Gilayon nga nagreport sa airport authority si Martin kag paagi sa rogue gallery na identify ang suspek kay Juvy Macalalad Zamora sang San Jose del Monte City, Bulacan.
Natigayon nga madakpan si Zamora apang sa P270,000 pesos nga ginkawat sa biktima, P65,000 na lamang ang narekuber kag wala na makit-an pa ang 10,000 nga HK dollars.
Sa statement nga gin pabutyag ni Martin sa media, indi lang naguba ang plano nga bakasyon para makaupod ang pamilya kundi nadula man ang tsansa sini nga magawad ang lupa nga ila naprenda.
Sa dugang nga pag panalawsaw sang kapulisan, nahibaluan nga involve man si Zamora sa pila pa gid ka insidente sang pag pang biktima sang mga balikbayan nga OFWs sa airport.
