Davao City – Gumikan sa kapuno sa mga ospital ug isolation facilities, gitugotan na sa City Government of Tagum sa Davao del Norte nga mag-quarantine sulod sa ilang panimalay ang mga pasyente sa Coronavirus Disease 2019 (COVID-19).
Matud ni Tagum City Mayor Allan Rellon (sa interbyu sa Davao City Disaster Radio) nga kadtong miabot og kapin usa ka libo ang COVID-19 cases sa Tagum, anaa sa kapin 800 sa maong ihap anaa lamang nag-isolate sa balay human nga napuno na ang Davao Regional Medical Center (DRMC) sa Tagum ug uban pang isolation facilities sa syudad.
“Naa na gani ‘mi sa punto nga severe ka, naa ka sa balay kay decking na… meaning naga-ventilator sya, naa sa balay. Dili pa siya madala kay puno pa ang room (facility), hulaton pa’g naay mugawas,” sulti ni Rellon.
Bisan pa man, hugot nga ginamonitor sa Local Government Unit (LGU)-Tagum ang mga pasyente sulod sa balay diin adunay namugna nga Tawag Amuma Task Group nga naga tawag matag adlaw sa nahisgutan sa pagmonitor sa ilang kahimtang.
Anaa usab ang Barangay Health Emergency Response Teams (BHERTs) nga nagamonitor sa mga pasyante pagsigurong sila mahatagan sa ilang panginahanglan sa matag adlaw.
RadyoMaN Kirby Manzon
