Davao City – Gipakusgan sa kapulisan sa San Isidro Police Station ang ilang kampanya batok sa loose firearms human masurender ang usa ka homemade improvised shotgun nga walay serial number ug bala sa Barangay Libuton, San Isidro.
Ang armas gidala mismo sa barangay hall ug gihatag ngadto sa kapulisan ni alyas “Lando,” 49 anyos, minyo, usa ka mag-uuma ug BPATs member sa maong barangay.
Matod ni alyas “Lando,” ang maong pusil nakuha lamang sa usa ka residente sa lugar, ug tungod sa kahadlok nga masikop tungod sa ilegal nga pagpanag-iya niini, gipili na lamang niya nga boluntaryo kining isurender sa mga otoridad.
Sa pagkakaron, anaa na sa kustodiya sa kapulisan ang armas alang sa hustong disposisyon.
Sumala ni PCAPT Manuel D. Aspellaga Jr., Officer-in-Charge sa San Isidro Police Station, ang paghatod sa armas maoy ebidensya sa mas lig-on nga kooperasyon tali sa kapulisan ug katawhan sa komunidad.
RadyoMaN Kareen Beltran
Facebook Comments
