Davao City – Gikontra sa Alliance of Concerned Teachers (ACT) ang ‘No Homework Bill’ nga giduso nila ni Sorsogon Representative ug House Deputy Speaker Evelina Escudero ug Quezon City Representative Alfred Vargas.
Sumala ni ACT-Davao City Chapter President Reynaldo Pardillo, dili maayong wad-on sa hingpit or bin ba kaha pakapinan og homework ang mga estudyante inig human sa semana.
Matud ni Pardillo, moderno na ang panahon karon ug sayon na lamang ang paghimo sa mga assignments dili sama kaniadto nga sa wala pa’y computer, libro ra gayod ang ukbon diha sa paghuman sa homework.
Gipalanog usab ni Pardillo nga daku’g ikatabang ang homework sa pagpalambo sa pagtoon ug disiplina sa mga bata kay mao kini ang lugar alang sa padayon nga pagtoon sa mga kabataan.
Segun ni Pardillo, ang homework kun assignments pamaagi kini aron mapakgang ang mga bata sa grabe nga exposure sa social media nga magdaut sa hunahuna ug maghimo kanila nga tapulan nga mga estudyante.
Nakasaway si Pardillo sa mga magbabalaud kinsa nagsugyot ning maong mga bills nga wala muagi sa makuti nga pagtoon una pormal nga giduso sa plenaryo sa Kongreso.
Dugang ni Pardillo, ang angay unahon sa pagtunol og igong pagtagad mao ang pagsulbad sa kakulang sa classrooms, textbooks ug gidaghanon sa mga magtutudlo ug dili ang mahitungod sa homework kun mga asignatura.
Ang House Bill No.3883 nga giduso ni Congressman Vargas magdili na sa mga magtutudlo nga mubilin og mga homework inig human sa semana gikan sa elementarya hangtud sekondarya.
Ang House Bill No 3611 nga gipasa ni Escudero magdili sa mga magtutudlo nga magpadala og mga libro sa pagpa-uli sa mga bata tungod sa kabug-at niini.
Ug ang mga magtutudlo kinsa makasupak sa gipanday nga balaud pagamultahan og P50,000 ug ma-preso sa dili mo-menos sa duha ka tuig.
RadyoMaN Joel Viray
