Davao City – Uyon ako sa suhestyon ubos sa gikasugyot ilawom sa Maga Carta for Barangays nga himoong fixed ug binulan nga suholan inay nga honorarium lamang ang pagadawaton sa mga elected barangay officials diha sa ilang pagpanerbisyo sa kabarangayan.
Una, ang regular salaary mag-standardize kun mag-uniform ingon man mag-professionalize sa pay scale kun salary scale o panuholan sa mga bag-ong mapili nga mga barangay executives.
Korehian niini ang naadang sistema nga honorarium system diin ang ubang mapili sa eleksyon mapugos kun ma-engganyo nga mag-sideline ilabi na niadtong kapitan ug kagawad sa mga gagmay’ng balangay diin diyutay ra intawon ang ilang Internal Revenue Allotment kun IRA nga maoy tinubdan karon sa ilang dawatonon nga mga honoraria.
Kun sweldado na sila, makabaton na karon ug igong rason ang katawhan nga mag-demand ug mas hingpit nga matang sa pagpangalagad sa mga taga-Barangay ug SK Councils inay nga magpunay lamang sila ug bagduy-bagdoy, motunga lang kun adlaw sa sesyon, gani ang uban ma-involved pa man gani sa mga hiwing binuhatan sama sa sugal, video karera ug illegal drugs sama sa nagapanghitabo karon.
Gani, kun ako lamang ang pabut-on, mas maayo kun ato pang seryosong tun-an ang pagpataas sa ilang sweldo haron atong ma-inspire kun ma-engganyo kadtong gitawag nga ‘the best and the brightest’ nga mga kandidato inay nga dangpanan lamang ang barangay election sa mga misfits, mga tawong walay mahimo sa ilang kinabuhi modagan na lamang basin pa diay ug modaug ug kadtong popular nga i-agi lamang ug pasikat ang kampanya ug kadaugan.
By doing that, we can ensure that the most basic political unit of our society becomes entirely equipped, fully empowered and truly strengthened.
Kun maghisgot ‘ta ug katikaran sa barangay, dili lamang kita angay mo-ingon nga ‘Barangay ra man ni’ kon dili, kanang makaingon kita nga ‘Barangay gyud ni’ – nga ang buot ipasabot, mahinungdanon ug kritikal ang klase sa liderato nga atong ibutang sa pwesto panahon sa piniliay ug dili kay mapugos na lamang kita sa pagpili niadtong salin sa nahurot – kay lagi, ang mga maayong kandidato mas gipili man nga dili na lamang managan.
RadyoMaN June Duterte
