Gibutyag ni Doctor Gabriel Fernandez, ang labaw sa Hospital Management Team ilalum sa opisina sa Sarangani Provincial Health Office, nga sila ang gapaningkamot nga mapadangat sa mga pasyente ang sakto nga serbisyong pang-hospital sa mga pampublikong hospital sa Sarangani Province gilangkuban sa provincial hospital ug lima (5) ka municipal hospital.
Segun ni Doctor Fernandez, sila naningkamot kauban ang mga chief of hospital nga makahatag og maayong serbisyo. Sya ang gituboy ni Governor Steve Chiongbian Solon nga manguna sa maong Hospital Management Team.
Nahimo ng Level I hospital ang Kiamba Municipal Hospital, buot ipasabot pwede ng makapa-opera, ug ang Malungon Municipal Hospital lakip na ang Glan Municipal Hospital ang on-process usab karong tuiga nga mahimong Level I hospital.
Ang Maasim Municipal Hospital ug Maitum Municipal Hospital ang on-going pud ang mga expansion aron daghan pang serbisyo ang mahatag. Samtang, ang provincial hospital nga karon usa ka healthcare facility ang naglaum nga mahimo kining Level II hospital sumala sa gi-plano sa pagpatukod ni Senador Manny Pacquiao nga kaniadto sya pa ang congressman sa Sarangani Province, ug karon suportado ni Congressman Ruel Pacquiao.
Ang limitadong serbisyo nga ginahatag sa infirmary hospital ug healthcare facility mao ang emergency services, clinical services, outpatient consultation, isolation room, minor surgery, normal nga pagpanganak, clinical laboratory, ug pharmacy. Samtang ang Level I hospital ang nagahatag og susamang serbisyo nga ginahatag sa healthcare facility plus adunay opera tungod sa kumplikasyon sa panganak, ug naay clinical services nga makaduol sa espesyalista sa Internal Medicine, Pediatrics, Surgery, OB/GYN, ug anesthesiology sa elective surgical cases.
Gipaningkamutan nila Doctor Fernandez nga matag shifting sa mga hospital ang aduna kini naka-duty nga duha (2) ka doktor. Mukabat na sa baynte kapin (20+) kabuok gitawag nga reliever physician ang gipanguha ug gi-swelduhan sa Provincial Health Office ubos sa pagdumala ni Doctor Arvin Alejandro aron mu-ayuda sa mga plantilla regular nga mga doktor nga anaa sa mga municipal hospital sa Sarangani.
Makanunayon pud ang advisory sa Hospital Management Team nga ipakita sa mga personahe sa mga public hospital sa Sarangani nga maayo sila mu-akomodar ug mulantaw sa kahimtang sa mga pasyente. Taliwala sa kadaghan sa mga pasyente ug sa limitadong resources, magpabilin dapat matud pa ang kurtesiya sa mga taga-hospital.
Dili lang ang mga pampublikong hospital sa Sarangani ang nakasinati og mga hagit ug kakulian sa pagpadagan kundili mao kini ang kasagarang kahimtang sa public hospital ug public health system sa tibuok Pilipinas, apan bisan pa niana ang buot ipadangat nga mensahe ni Governor Solon mao nga atimanon gyud ang mga pasyente nga mugawas kining malipayon taliwala sa sitwasyon gumikan gi-atiman sila sa mga personahe sa hospital, ug nadapatan sila sa hinanaling medical intervention aron dili musamot ang ilang balatian.
Philhealth-accredited na ang provincial hospital ug ang lima ka municipal hospital maong dili na malisdan sa pagbayad hilabi na matud pa nga naga-praktis ang tanang municipal hospital sa Sarangani sa palisiya nga “no balance billing policy” sa mga medical cases nga masulod sa guidelines sa Philhealth.
Kadtong dili makaya sa municipal hospital ang i-refer kini sa tulo (3) ka tertiary hospital sa Gensan kung diin pwedeng maka-benipisyo ang pasyente sa seventy percent (70%) sa iyang hospital bill pagabayaran sa probinsya, nailhan kini sa tawag nga MOA (mo-wa, Hospital Assistance Program). May MOA ang Kapitolyo sa Sarangani sa Gensan Emergency Hospital, Diagan Hospital ug SOCSARGEN Hospital. Aduna pay AICS (ah-iks) nga pwedeng maangkon sa pasyente kadtong dili masulod sa MOA, makadawat kinig dili muubos Singko Mil ka pesos (P5K), gipondohan ni Governor Solon kauban sila Vice Governor Elmer De Peralta ug mga board member.
