Davao del Norte – Padayon ang gihimong hot pursuit operation sa kapolisan sa mga suspek nga mi-dagit o hold up sa usa ka 16 anyos nga dalagita sa Barangay Esperanza, Sto.Tomas, Davao del Norte, samtang nag-jogging kauban ang iyang igsoon ug usa pa ka bata alas 6:30 sa buntag niadtong Martes (Marso 16, 2021).
Sa interbyu sa DXDC RMN Davao kang Police Major Frederick Deles, Chief of Police (COP) sa Sto.Tomas Municipal Police Station (MPS), gibutyag niini nga naggikan sa Tagum, ang duha ka naka-bonnet nga suspek nga nag-motor ug gitionan sa pusil ang biktima rason nga nadagit kini padulong sa Tagum, apan gibilin ra usab sa suok nga lugar sa Bincungan, syudad sa Tagum.
Nakuha gikan sa dalagita ang cellhpone niini. Samtang, gilayong gi-ayudahan ang biktima pinaagi sa Municipal Social Welfare and Development Office (MSWDO) human kini na-rescue pasado alas-8 sa buntag sa susamang adlaw.
Aduna nay mga personalidad nga gimonitor ang kapulisan ug ginasuwayan og paila sa biktima kung mao ba kini ang posibleng midagit kaniya.
“Wala pa ‘tay (suspek) tungod kay dili pa ma-identify (sa victim) ang pictures. Dili pa kaayo ka-focus. Siguro na-shock pa siya ba. Wala lang sa namo gikuan kay lisod, na-trauma man gud ang bata. Pero naa na ‘tay gipang subaybayan nga mga personalities. Basin diay mao ‘ning mga tawhana. Mura’g mga involvement nila ana kanang mga holdup,” saysay ni Deles.
Pahimangno sa pulis ngadto sa publiko nga mag-amping kanunay ug magkuyog og hamtong o grupo kung molakaw labi na sa mingaw nga mga lugar aron kalikayan ang susamang insidente.
RadyoMaN Kirby Manzon
