Davao City – Wala pa’y direkta nga epekto sa industriya sa mga hotel sa siyudad sa Dabaw ang padayon nga pagsaka sa presyo sa produktong petrolyo ug pagtaas sa presyo sa Liquefied Petroleum Gas (LPG) karong panahona.
Gisulti ni Royal Mandaya Hotel Manager Benjamin Banzon nga wala pa matay-og ang mga hotel sa dakbayan sama sa Royal Mandaya Hotel sa padayon nga pag-usbaw sa presyo sa LPG ug petrolyo.
Segun ni Banzon nga timaan niini mao ang padayon nga pagdaghan sa mga turista nga mibisita sa dakbayan ug nag-book sa ilang hotel niining ulahing mga adlaw.
Matud ni Banzon nga wala niubos ang gidaghanon sa ilang mga kliyente sa hotel ug kani nagpamatuod lamang nga walay epekto sa ilang industriya ang kamahal sa petrolyo ug LPG karon.
Dugang ni Banzon nga dili na bag-o sa Pilipinas ang pagmahal sa petrolyo sa pangkalibutanong merkado kay sukad pa kaniadto miagi na og 80 dolyares ang presyo sa matag barrel sa petrolyo.
Kampante ang tagdumala sa maong balay-pamatigayon nga malampasan ug masulbad ra sa kagamhanan karon ang giatubang nga kamahal sa presyo sa petrolyo ug LPG.
Ug matag karon ug unya, nagpahigayon ang maong hotel og pagsusi sa costing kung anaa pa sa sakto ang balor sa ilang operasyon nunot sa walay hunong nga pagsaka sa LPG ug petrolyo.
Ug kung masuta nila nga malugi ang operasyon sa hotel gumikan sa pagmahal sa LPG ug petrolyo, dinha na magpa-usbaw sa rates sa accommodations ang naasoy nga balay-pamatigayon, dugang ni Banzon.
RadyoMaN Joel Viray
