Davao City – Niadtong nakalabay’ng semana ang mga pulis sa Davao City Police Office (DCPO) ang gideploy sa pagpanguna ni DCPO City Director Police Sr.Supt Alexander Tagum sa send-off Ceremony sa DCPO aron mamahimong hapsay ug malinawon ang election.
Lakip motabang sa pagbantay ang mga nagkadaiyang Law Enforcement Agency lakip na ang Maritime sa piniliay karong adlawa.
Sumala ni DCPO Spokesperson Police Sr. Inspector Maria Therisita Plaza Gaspan ang kapin usa ka libo ka mga police lakip ang mga gipang-augment nga gidestino sa 12 ka Police Station nga maoy mubantay sa 182 ka mga Barangay sa siyudad sa Davao.
Dungan niini gipasidan-an usab ni Tagum ang kapolisan nga pahugtan gayud, ang pagbantay sa 266 ka polling precincts sa nagkadaiyang barangay ning dakbayan.
Sa pikas bahin, hugot usab ang suporta sa kasundalohan sa kapolisan sa pagbantay alang sa malinawon nga pagboto ilawom sa 10th infantry Division Area Philippine Army ning rehiyon 11.
Matud ni Lt. Col. Noman Alcobines Civil Military Operation (CMO) Batallion Commander 10th ID usa sa ilang hugot nga bantayan ang pagdala o paghatud sa mga election paraphernalia.
Sa pikas bahin mokabat sa 251 ka mga barangay ang giilang Election Watchlist Areas (EWAs) sa Davao Region, base sa datus nga gipagawas sa Police Regional Office (PRO-XI).
Gipasabot ni PRO-XI spokesperson PCI Milgrace Driz, dili nila pweding ibutyag sa publiko ang mga espesipikong lugar nga anaa sa listahan.
Subay sa record, sa 182 ka mga Barangay sa syudad sa Davao, adunay 55 ka mga Barangay ang gipailawom sa Election Watchlist Areas (EWAs), 44 sa Davao del Sur, pito sa Davao Occidental, 50 sa Davao Norte ug 68 sa Compostela Valley Province nga maoy pinakadaghan.
Sa tibuok Region 11, adunay napulo ka mga barangay ang anaa sa Category 1 nga aduna nay natala nga seryosong panagbangi sa politika ug ang posibilidad nga mag-hire og pribadong armadong grupo, samtang 241 ka mga barangay anaa usab sa Category 2 nga adunay serious armed threats ug presensiya sa mga rebeldeng grupo.
Alayon niini Giklaro usab ni Driz, gisangon usab sa kapolisan ang pagbungkag sa giingong mga Political Armed Groups nga posebling gamiton sa mga politiko panahon sa election nga magkamugna ug kasamok.
Una niini gibantayan karon sa Kapolisan sa Sta.Ana, ang Barangay 23-C Piapi Boulevard tungod sa hugot nga bangi sa Politika tali sa duha ka mga kandidato sa pagkabarangay kapitan.
Sumala ni P/Chief Insp.Nolan Raquid hepe sa Sta.Ana Police Station, usa sa ilang hugot nga bantayan ang maong barangay base sa mga natalang kasamok sa maong lugar nga may kalambigitan sa Election.
Apil usab nga hugit nga gibantayan ang Barangay 76-A Bucana tungod sa init nga dagan sa politika tali sa kanhi Barangay Kapitan nga mopapili pag-usab ug sa kasamtangang Barangay Kapitan nga mopapili usab karong adlawa.
Una niini gipahibalo ni Driz ang kapolisan nga magpabiling neutral ug walay dapigang bisan kinsang kandidato.
RadyoMaN Bernard Pantallon
