Pinasalamatan ni House Committee on Ways and Means Chairman at Albay 2nd District Representative Joey Salceda ang pag-review ng Department of Transportation (DOTr) sa implementasyon ng Public Transport Modernization Program (PTMP).
Sa liham kay Transportation Secretary Vince Dizon ay hiniling ni Salceda na maging bahagi ang kanyang tanggapan ng pag-aaral sa programa lalo na sa pinansyal na aspeto nito.
Binanggit ni Salceda sa liham na dapat ikonsidera ang presyo ng kada unit ng modern jeepney dahil kasama ito sa pagbabatayan kung kakailanganin na magtaas ng pasahe sa hinaharap.
Ipinunto ni Salceda na kapag mas mura ang mabibiling PUJ units ay mas mababa ang fare adjustments na umaayon din sa lumabas na impormasyon sa pagdinig ng House Committee on Transportation.
Giit ni Salceda, may mga domestic manufacturer na nag-aalok ng mas murang PUJs.
Suhestyon din ni Salceda na gawing inclusive ang public transport systems para sa senior citizens at may kapansanan, gayundin ang pagpapabuti sa mga ruta para sa mga paliparan.
