House-To-House nga pamaagi sa Feeding Program, ginapahigayon sa Malaybalay City taliwala sa pandemya

26

Gipaagi sa house-to-house nga pag-apod-apod ang mga alokasyon sa mga batang underweight sa Feeding Program nga kasagarang ginahimo sa tradisyonal nga pagtapok-tapok sa dakbayan sa Malaybalay isip pagsunod sa mga sumbanang gitalaga sa nasinatiang pandemya.

Kini ang gibutyag ni Iza Canonigo, Nutrition Officer III sa City Health Office sa dakbayan sa Malaybalay atol sa interview sa RMN.


Sumala ni Canonigo nga gilakip usab nila sa maong programa ang mabdos nga walay kaya, mga batan-ong namabdos, mga niwang ug uban pa aron nga masuportaan ang bata sa tiyan niini.

Gikinahanglan kono nga matutukan ang nutrisyon sa bata samtang anaa pa kini sa sulod sa tiyan sa inahan nga lakip sa permirong 1000 days niini.

Dugang ni Canonigo nga natala sa Brgy. Aglayan ang kinataasang kaso sa mga batang ubos ang timbang sa pagkakaron. Gisundan kini sa Brgy. Zamboanguita, Linabo, Magsaysay, Dalwangan, St. Peter ug Brgy. 10. Nahilakip usab sa Top 10 sa dakbayan ang Brgy. Caburakanan, Bangcud ug ang Brgy. Cabangahan.

Dugang ni Canonigo nga kinahanglan gayud tutukan ang malnutrisyon sa dakbayan bisan paman nakitaag pag-ubos kung itandi sa milabayng tuig.



Sa pagkakaron anaa sa 3.8% ang ihap sa mga underweight sa dakbayan, ubos kung itandi sa miaging tuig sa 3.9%, samtang ang mga stunted kon putot anaa sa 6.7% gikan sa 10.8% sa milabayng tuig, miubos usab ang porsyento sa mga gikonsiderang wasted kon dili haom sa timbang ang gitas-on sa bata sa 2.8% gikan sa 4.3% sa milabayng tuig.

Facebook Comments