Hubog mitabok nabanggan og bus, patay

Davao City – Mipasalig ang kumpanya sa bus nga abagohon ang galastohon sa pagpahilona sa lalaki nga nabanggaan-patay sa Ramon Delos Cientos Street, Poblacion Dos, Bansalan, Davao del Sur atubangan sa usa ka eskwelahan alas 9:00 sa gabii, November 10, 2023.

Sa interview sa DXDC RMN Davao kang Police Captain Orlando Udalve, Officer-In-Charge sa Bansalan Municipal Police Station, iyang giila ang biktima nga si Danilo Culano, 47 anyos, construction worker ug residente sa Sta. Maria, Davao Occidental.

Gisaysay sa pulis nga hubog ang biktima sa dihang mitabok kini sa dalan ug tungod kay ngitngit ang lugar ug dili usab kini pedestrian lane, nabanggaan sa bus nga gikan Cotabato padulong Davao nga gimaneho ni Roco Sumarinas, 36 anyos, taga Maa, Davao City.

“Kining biktima nato, nakainom diay ni. Nitabok sya, pagkahuman naa man syay truck gilikayan, nibalik sya sa iyang agi, naigo sa Mindanao Star (bus), sulti ni Udalve.

Dugang sa pulis nga dili na ipadayon ang kaso sa pamilya sa biktima apan muhatag og pinansyal nga tabang ang bus company sa pamilya.

Pahimangno sa police official sa publiko nga siguradohong anaa sa maayong kondisyon kung mutabok sa dalan aron malikayan ang susamang insidente.

RadyoMaN Kirby Manzon