Ivisan, Capiz – Patay ang isa ka construction worker matapos ginbuno sang kaupod sini sa gina-construct nga building sa sulod sang Ivisan national High School sa Barangay Poblacion Norte, Ivisan, Capiz.
Dead on arrival sa Capiz Emmanuel Hospital sa syudad sang Roxas ang biktima nga ginkilala kay Elmor Palomado sang Passi City, Iloilo matapos ginbuno sang iya kaupod man nga construction worker nga si Gester Gamao sang Barangay San Antonio, Pilar, Capiz sa guwa sang ila barracks.
Ginpahayag ni SPO3 Benjie Olisco, imbestigador sang Ivisan PNP, pasado alas 10:00 kagab-i samtang nagainum si Palomado kaupod sa iban nga trabahador sang gulpi lamang napatay ang suga sa ila barracks.
Bangud sa kaakig ginpangbuklas man sini ang mga linya sang kuryente samtang nagasinggitan kag nagawangal sa guwa sang barracks. Ginsaway ni Julito Gamao, amay sang suspek ang nagawaras nga biktima rasun nga nagsabtanay ang duha.
Nakabugtaw si Gester kag nabatian sini ang kinagamo rasun nga nag-apin ini sa iya amay. Nagkuha sang kutsilyo ang suspek nga si Gester kag ginlagas ang biktima nga si Elmor. Wala makapalagyo ang biktima kag natigayon gid nga nabun-an sang suspek.
Gilayon naman nagpalagyo si Gester Gamao matapos ang insidente. Nahibaluan nga may daan na nga indi pag-intindihanay ang amay sang suspek kag ang biktima nga madugay na nga nagluntad banwa sang Pilar.
*(photo SPO3 Benjie Olisco, Ivisan PNP )*
