BACOLOD CITY – Nagapangayo karon sang pasensya kag patawad ang isa ka hinablos nga nagsumbag sa iya tiyo kag aksidente nga napatay kagab-i sa Brgy. Tangub, Bacolod City.
Ang suspek nakilala kay Rowel Lariosa, 31 anyos, residente sang Brgy. Cabug, Bacolod City, samtang ang biktima naman nga iya man lamang tiyo ang ginkilala kay Ronnie Lariosa, 55 anyos, pumuluyo sang Purok San Roque, Brgy. Tangub, lunsay mga construction worker.
Suno sa imbestigasyon may mga las 5 kahapon sang hapon nagpauli na kuntani ang suspek kag ang biktima sakay sa motor halin sa ila gina-obrahan nga construction sa dalan Magsaysay.
Apang nagbalik ang mga ini bangud nga nabilin didto ang bag sang suspek kag ila ginkuha, apang imbes nga mag diretso pauli naghinagaray ang mga ini nga mag-inom inom.
Bangud kay hubog na, gindul-ong sang hinablos ang iya tiyo sa Tangub kag didto nagluntad ang indi nila pag-inintiendihanay tubtub nga ini sila ang naglalisay.
Ginpahayag ni Rowell nga iya nasumbagan ang iya tiyo kag ini ang nagbalos man kag nagsumbaganay ang mga ini.
Matapos sang insidente, naglakat si Rowell kag wala siya nakahibalo nga natumba na gali ang iya tiyo kag pagdalasa ospital, napatay na.
Sa karon, desidido ang pamilya nga pasakaan sang kaso ang suspek./DYHB BACOLOD
