Hugos: Mga batan-ong dunay problema, gidasig dili luomon ang suliran

Davao City – Mas maayo og masulti sa usa ka batan-on o indibidwal ang iyang ginada-dala nga problema aron mahupayan ang bug-at nga gibati. Kini ang gisulti ni Police Major Marvin Hugos, Hepe sa San Pedro Police Station atol sa interview sa DXDC RMN Davao diin matud niini, dili angay luomon apan isugilon ang mga problema ngadto sa uban aron makadawat og tambag ug giya ug aron malikayan ang pagpakamatay.

Subay kini sa napalgang patay’ng lawas sa Purok 20, Bucana, Barangay 76-A, Davao City kaganinang alas 6 sa buntag diin gituohang nakasinati og depression ang lalaking si Alyas Carl, 20 anyos, ulitawo kinsa nakit-ang naglutaw na sa kadagatan sa Bucana ug wa na’y kinabuhi. Matod sa hepe, ulahing nakita ang biktima nga nagbaktas – baktas sa seawall ganinang alas 2:30 sa kadlawon.

Giklaro niini nga walay foul play sa kamatayon sa biktima apan naghangyo karon ang San Pedro PNP ngadto sa mga ginikanan sa lalaki nga mapailawom sa otopsiya ang patay’ng lawas aron masuta ang tinuod nga gikamatyan niini hilabi na nga wa’y nakitang bun-og ug samad sa lawas sa biktima ang mga otoridad.

Ning bulan sa Setyembre, ginaobserba ang Suicide Prevention Month diin pinaagi niini, ma-edukar ang katawhan bahin sa paglikay sa suicide. Alang sa mga dunay kaila o si kinsa man ang buot mangayo og tabang aron malikayan ang nasangpit, mamahimong mutawag sa National Center for Mental Health (NCMH) crisis hotlines: 0917-899-USAP (8727), 0966-351-4518, and 0908-639-2672.

RadyoMaN Joel Viray