Dimataling, Zamboanga del Sur – Hugot nga seguridad ang gipatuman sa kapulisan ug kasundaluhan sa lungsod Dimataling nga sakop niiining probinsya human gibulabog sa buto sa armas ang mga ginsakpan sa Board of Canvassers samtang gipahigayon ang pag-canvass sa mga botos.
Nahitabo ang parpa-arak sa Purok 5, Brgy Kagawasan, Dimataling alas 11:00 kagabii ug lakip nga gipunterya sa mga armadong suspetsado ang Electric Transformer hinungdan nga nakasinati og brown out sa tibook gabii ang lugar.
Sa ulahi nga impormasyon, nakakuha og kopya sa Close Circuit Television kun CCTV footage ang tropa sa kapulisan sa lungsod sa Dimataling nga maoy gigamit sa lapad nga imbestigasyon diin nasayran nga maskarado ang mga suspek nga armado sa tag-as nga matang sa armas nga nakaposisyon doul sa canteen sa munisipyo.
Nakit-an sa crime scene ang 23 ka ihap sa basiyo sa bala sa M16 Garand Rifle nga maoy gigamit sa unom ka mga suspek ug swerte nga walay napagan sa panghitabo.
Kagahapon hingpit na nga nailisan ang naigo nga transformer rason nga nibalik normal ang supply sa kuryente ug lauman nga sa dili madugay ma-ressume ang canvassing sa botos.
Nagpahimangno na sa mga supporters sa politiko si Atty. Jossil Macute ang Comelec Provincial Election Supervisor nga dili magpadala sa init sa ulo aron malikay sa tensyon.
Lauman nga ugmang adlaw i-proklama na ang mga nanaog sa Probinsyal ug lokal nga posisyon unom ka adlaw human ang eleksyon.
Dismayado ang mga botante sa kalangan sa resulta ug bisan na gani ang mga kandidato lakip nga nipasibaw sa ilang negatibong reaksyon gumikan sa kalangan sa proseso sa pag-ihap sa balota ug pagpagawas sa resulta.
Una nang nangayo ug pasaylo sa katawhang botante ang Comelec-Zamboanga del Sur gumikan sa wala damhan problema nga nasugatan atol sa eleksyon.
