Human ang duha ka adlaw nga consultation dialogue tali sa mga internally displaced persons o IDPs ug sa Task Force Bangon Marawi, nga gilangkuban sa nagkalain-laing ahensiya sa gobyerno, usa lang ang ilang gusto nga mahitabo – tugutan na silang maka-uli ngadto sa ilang matag dapit sulod sa most affected area aron makasugod og repair o kaha tukod og balik sa ilang balay.
Kini tungod kay, matud pa sa maong mga pamilya, hapit na magduha ka tuig ang ilang lisod nga kahimtang -kung ang uban kanila dunay kahigayonan nga makapangabang og mas kumportable nga balay sa Iligan City ug Cagayan de Oro City, ang kadaghanan anaa sa mga transitory shelters ug ang uban anaa pa sa mga evacuation tents.
Sa ikadaghan nga higayon, nagtakda na usab ang TFBM og deadline -Sa katapusang semana sa Agosto, tugutan na’ng makasugod og panday, repair o kaha tukod ang mga residente sa ilang mga pinuy-anan nga naguba tungod sa lima ka bulang giyera sa gobyerno ug sa mga terorista.
Sa pagka-karon, matud pa sa explosive ordnance division atol sa maong consultation dialogue, duna pay 3 ngadto na sa 5% sa 70 ka nga unexploded ordnance o UXOs, o kining mga bomba nga wala maka-buto panahon sa gyera, ang ilang kamulo nga gi-clear o gikuha.
Kinahanglan kini, matud pa, nga makuha sa dili pa magsugod og pamalik sa sulod ang mga residente tungod kay delikado kini ngadto kanila.
Hagit sa mga residente, tinud-on ang bag-ong deadline. Kung dili kini matuman, kinahanglang mo-resign si Housing Secretary Eduardo Del Rosario, ang chairman sa Task Force Bangon Marawi.
