Human nga gipabuto niadtong Sabado, Agosto 3, sa Task Force Bangon Marawi-Joint Task Group Builder ang duha ka mga dagkung bomba nga nakuha atol sa demolition and clearing operation sa most affected area sa Marawi City, kapin 40 pa ka mga unexploded ordnance ang padayon nga pangitaon sa mga eksperto sa sulod.
Matud pa ni Col. Rene Sebastian, commander sa Joint Task Group Builder, nga maoy in-charge sa debris clearing, kini nga mga bomba gihulog sa Philippine Air Force niadtong panahon sa giyera niadtong 2017 aron sumpoon ang mga terorista nga mi-atake sa Marawi City.
Niadtong Sabado, gawas sa 260 ug sa 110-pounder nga general purpose bomb, gi-detonate o gipabuto usab ang uban pang mga bomba sama sa mortar ug artillery projectiles ug mga Granada, pasado alas-11:00 sa buntag sa may Barangay Moncado Colony.
Gisulod sa usa ka kinalutan nga yuta nga adunay gilawmon nga siyam ka metros ang mga bomba, gitabunan og yuta ayha gipabuto ang duha ka mga general purpose bombs nga maoy hinungdan sa pagbuto sa uban pa’ng mga gagmay’ng bomba.
Kabahin ang gihimong detonation and disposal sa nagpadayon nga rehabilitation and rebuilding program sa Marawi City.(Divina Suson)
