Davao City- Hustisya ang ginapangayo sa pamilya sa usa ka pulis nga gipusil-patay sa Tugbok ning syudad sa Davao kaniadtong Nobyembre 13.
Gilauman nga makab-ot nila ang hustisya sa pagkamatay ni PO3 Wilfredo Garol, usa ka intel operative sa Baguio District Police Station.
Kaganina, gilubong na si Garol sa Calinan Memorial Park ug gihatagan og burial honors sa mga kauban niini sa trabaho.
Samtang anaa nay gunit nga pangalan sa mga suspek nga mihimo sa krimen ang Tugbok Police apan wala pa nila kini gipagawas tungod nagpadayon pa ang ilang imbestigasyon diin usa sa mga gidudahang motibo sa kapulisan sa pagpatay sa pulis mao ang sa trabaho niini isip intel operative.
Sumala sa Tugbok police, sakop sa New People’s Army kun NPA ang usa sa mga gidudahang mipusil-patay kang Garol.
RadyoMaN Renz Barbarona
