Davao City – Pasado alas 6:00 sa gabii nakabsan na sa kinabuhi ang 3 anyos
nga batang babae kinsa sunog ang entero kalawasan human giingong gidauban
sa kaugalingon niining amahan sulod sa ilang panimalay didto sa Purok 26,
Malagamot, Brgy. Panacan ning syudad sa Davao.
Sa interbyu sa RMN Davao sa inahan sa bata nga si alyas Jane, pursegido
kining magpasang-at og kaso batok sa iyang kanhi kapuyo kinsa gitudlong
responsible sa pagkamatay sa ilang anak.
“Akong panawagan sa lokal nga panggamhanan nga unta matagaan og hustisya
ang akong anak, nga unta madugta siya (ang suspek) sa kulungan,” sumala sa
inahan sa biktima.
Buot niining didto na ipahulana ang patayng lawas sa biktima sa ilang
panimalay sa Banate, Malungon, Saranggani Province.
Gisaysay sa inahan nga tuig 2016 iyang gibulagan ang suspek kay wala na
kini makaantos sa gihimong pagpangulata kaniya ug nidesidar nga dalaon og
apil ang ilang anak.
Apan niadtong Disyembre 30, 2016, gikuha sa suspek ang bata kinsa gibilin
sa balay sa iyang apuhan ug gibitbit dinhi sa dakbayan sa Davao.
“Gibilin nako ang bata sa akong mama para ko manarbaho kay ang bata
dako-dako naman, sa akong pagpanarbaho gilipat niya akong mama ug wala siya
nananghid og gikawat niya ang bata kang mama,” matud niini.
Sumala sa inahan wala gayod makuha niya og balik ang bata tungod kay
gipanghulga sila sa suspek.
“Ug amo siyang adtuon ug kuhaon ang bata iya man ming lagarawon, walay
makaduol sa among kaliwat bisan sa iyang igsuon nga pulis dili siya
magpatuo,” dugang sa inahan sa bata.
Nakurat nalamang si alyas Jane human kini makadawat og tawag gikan sa Sasa
PNP nga kritikal na ang bata sulod sa Southern Philippines Medical Center
(SPMC).
Sa pikas bahin, sumala ni CSSDO-QRTCC center head Juenalyn Pablo padayon
ang ilang pag-atiman sa pamilya sa minor de edad nga biktima aron
mapahiluna kini ug tarong.
Matud ni Pablo nga adunay team gikan sa CSSDO nga ni-asister s inahan sa
bata diha sa pagpasaka og kaso batok sa suspetsado.
RadyoMaN Aimee Guinita
