Davao City – Midangop dinhi sa sibyahanan sa DXDC RMN Davao ang igsuon sa namatayng biktima human nabanggaan sa Diversion Road ning syudad sa Davao niadtong Abril 1 aron sutaon ang impormasyon og tinuod ba ang anaa sa Comval ang Strada nga nakabangga sa mag-inahan.
Sa pakighinabi sa DXDC RMN Davao, nadungog ni Lorin nga anaa kuno sa Comval ang sakyanan nga nakabangga apan buot niya kini ipaklaro kung tinuod ba kini.
Gitawagan sa RMN Team ang Buhangin PNP apan dili pa available ang imbestigador sa maong kaso.
Panawagan karon ni Lorin kung kinsa man ang responsable sa pagkamatay sa iyang igsuon nga giilang si Lorie Ocada, 43 anyos, ug anak niini nga si Shinkichie Ocada, 15 anyos nga musurrender na sa otoridad.
Ang maong mga biktima gilubong na niadtong adlawng Biyernes, Abril 6 sa wireless cemetery ning syudad diin padayon nilang ginasinggit ang hustisya sa pagkamatay sa ilang duha ka miyembero sa pamilya.
Samtang ginabantayan usab nila karon ang bana sa biktima ni Lorie nga usa ka hapon tungod sa grabeng pagkasubo sa nahitabo sa iyang mag-inahan diin hangyo niini nga musurrender na ang responsable sa pakagbangga ug buot usab niini nga mangayo lang unta og pasaylo ang nakabangga ngadto sa ilahang pamilya.
Kahinumduman nga nabanggaan-patay ang mag-inahan sa Diversion Road diin nasayran nga mitabok ang mga biktima agi sa pedestrian lane apan pag-abot sa tunga kalit na lamang sila nadasmagan sa naghaguros nga Strada nga paingon sa dalang Maa.
RadyoMaN Renz Barbarona
