Napuno karon sang indi matakos nga kasubo ang isa ka iloy matapos nga nagtaliwan ang iya bata bangud sang Dengue, dugang pa bangud nagapati ini nga ginpabay-an sang ospital ang iya anak.
Ang iloy amo si Anne Labansawan, 31 anyos, residente sang Brgy. Su-ay, Himamaylan City kag isa ka call center agent diri sa ciudad sang Bacolod samtang ang bata naman niya nga napatay amo si Ace Xian delos Santos, 6 ka tuig ang edad.
Suno kay Anne nga pasado las 8 sang gab-I una nga gindala sang iya ginikanan sa isa ka ospital sa Kabankalan City ang iya bata bangud ginhilanat ini, ginkuhaan CBC kag urine test kag ang resulta naga-gwa nga ini ang may UTI.
Ginpahayag ni Anne nga wala sila naglaum nga magka-Dengue ang bata bangud nga 300 ang platelet sini base sa lab test sang amo nga ospital apang gin-confine ini.
Sang masunod nga adlaw, July 12, liwat ginpaidalum sa laboratory test ang bata apang para naman sa stool kag sa gihapon on and off ang hilanat sang bata.
Naglipas pa ang masobra 24 ka oras suno kay Anne sang liwat ginpa CBC ang bata kag nag-gwa sa resulta nga 200 ang plalete (base sa lab test sa amo nga ospital).
July 14 sang nagpauli sa Kabankalan si Anne halin sa iya trabaho sa Bacolod kag didto iya nakita nga indi na maayo ang sitwasyon sang iya bata bangud gina-seizure na ini apang suno kay Anne ginhambalan gid lamang siya sang doktor kag nurse nga normal lang ini bangud may UTI ang bata.
Apang sang pagkasunod nga adlaw, July 15 pasado las 10 sang aga suno kay Anne iya nakita nga indi na gid maayo ang sitwasyon sang iya bata gani nagdesisyon sila nga dal-on na lamang sa ospital diri sa Bacolod ang biktima.
Suno kay Anne nga naayawan pa sila sang hulat sang ambulance bangud siling sang ospital indi pang long distance ang naka standby sa ila.
Bangud sini, nag-mato mato si Anne kag siya na lamang mismo ang nagpangita sang ambulance kag sa Himamaylan pa ini naka-kuha kag ang malain pa suno kay Anne bangud nga kon wala pa nagpangakig ang iya iloy, wala pa nagpadala nurse ang ospital agud mag-upod sa ambulance.
Ginpahayag ni Anne nga sang nagalakat na, nagdesisyon sila nga dal-on sa isa pa ka mas malapit nga ospital sa Kabankalan kag ini ang ila gindala sa isa ka private hospital.
Ginsiling ni Anne nga iya gid nakita ang difference sini sa ila ginhalinan nga bululngan bangud pag-abot diri gilayon nga gintatap sang 3 ka mga doktor si Xian apang ulihi na ang tanan bangud base sa resulta sang CBC, 16 na lang gali ang platelet sang bata.
Pasado las 2 sang hapon sa amo nga adlaw, July 15 gindeclare nga patay ang bata bangud sang severe Dengue.
Kasubo kag kaakig ang ginabatyag ni Anne suno sa iya bangud nagapati ini nga ginpabay-an ang iya bata sa amo nga ospital kag kon gintatap gid lamang ini kuntani sang maayo, buhi pa ang iya pinalangga nga bata.
NOTE: Ginatinguhaan sang DYHB nga makuha ang panugdaon sang natungdan nga ospital agud mapalayag man diri ang ila bahin.
[image: image.png]
