Davao City – Gipanguluhan sa lokal nga panggamhanan ang usa ka memorial service kagahapong adlawa, Disyembre 21, 2018 alang sa pagkomemorar sa 1st year anniversary sa NCCC Mall fire incident nga nihunos og 38 ka mga kinabuhi.
Sa interbyu sa RMN Davao kang Chad Daluro bana ni MaryJoy Hope Daluro nga usa sa mga namatay sa sunog nga nitambong sila sa gipahigayong misa kagahapon sa hapon sa San Pedro Cathedral.
Sumala ni Daluro nga nagpabilin siyang lig-on nga malampasan niya ang nahitabong trahedya nga maoy hinungdan sa pagkawala sa iyahang misis nga si MJ.
Gisulti niini nga aduna siya’y diutay nga pagkadismaya sa hinay nga pag-uswag sa kaso.
Nagmalaumon kini nga mahatagan gayod ang ilahang pamilya og hustisya.
Nakighimamat usab si Davao City Mayor Inday Sara Duterte-Carpio sa mga pamilya sa mga namatay atol sa misa.
Matud ni Daluro nga na-appreciate nila ang gihimo sa City Government of Davao.
Laing misa usab ang ipahigayon karong Dominggo sa San Pedro Cathedral sa inisyatibo sa NCCC Mall.
Mensahe ni Daluro sa uban pang pamilya nga sama niya nagpadayon sa pagtikang human sa mapait nga kasinatian nga dili sila mawad-an og pagsalig sa kahitas-an ug magpadayon gihapon sa ilahang mga kinabuhi.
Kahinumduman nga human nga napasang-at sa Inter Agency Anti-Arson Task Force ang mga kaso batok sa 33 ka mga indibidwal niadtong Agosto 30, gipasalig sa City Prosecutor’s Office nga tapuson nila ang ilahang preliminary investigation una pa man ang usa ka tuig nga anibersaryo sa NCCC Mall fire incident.
RadyoMaN Aimee Guinita
