Davao City – Nagbangutan ug dili madawat sa mga kabanay ang pagpamatay sa ilahang pamilya lakip na ang usa ka 5 anyos nga bata didto sa may Sitio Guilon, Brgy. Marilog, Marilog District, Davao City alas-9:30 sa gabie niadtong Martes.
Sa interbyu sa RMN Davao sa nahibiling mga anak nga wala gihapon nila makab-ot ang hustisya bisan pa man nga napatay atol sa operasyon sa mga awtoridad ang suspek nga CAFGU.
“Kulang pa ang iyahang kamatayon, gipatay niya among mama, among mga igsuon, ang sakit pa kaayo kay giapil pa niya among pag-umangkon nga taas pa unta ni’g maabor sa iyahang kinabuhi.”
Una pa man matud pa nahitabo ang massacre nagbahad na ang suspek kanila.
Base sa imbestigasyon sa kapulisan nga kasuko o dumot ang gilantaw nga motibo sa krimen.
Nasayran nga gikatakdang mugula ang warrant of arrest batok sa suspek sa kasong pagpanlugos og 13 anyos nga usa usab sa mga kabanay sa mga gipang-massacre kinsa anaa sa pag-amuma sa DSWD.
Sumala ni Jerome, kabanay sa gipamatay, nga gipadayon nila ang Rape case kontra sa suspek nga si Randy Silay Balagisi alyas Randy Alba kinsa maoy nilugos sa iyahang 13 anyos nga manghod human wala matuman sa pamilya sa suspek ang mga nasabutan sa nahitabong panaghusay sa ilahang tribu.
Gisaysay usab sa 13 anyos nga rape victim nga Setyembre niadtong 2018 gibunlot siya sa maong suspek padulong sa bagnutan ug didto na kini giamong-amongan.
Wala pa gihapon sa maayong pamuot ang biktima kinsa gikan sa shelter sa DSWD nga patay na niyang nakita pa og balik ang iyahang inahan ug mga igsuon.
RadyoMaN Aimee Guinita
