Davao City – Misamad og maayo sa kasingkasing ug pagbati sa mga kabanay sa 38 ka call center agents sa SSI kay namatay sila nga walay nabuhat sa pagluwas kanila gumikan sa kadako sa kalayo nga milamoy sa NCCC Mall kung asa ang mga biktima natanggong sa ikatulong andana.
Mas labihan pa gyod ang ilang gibating kasakit dihang sa ilang nasayran nga wala makasunod ang NCCC Mall ug SSI sa safety protocol apan nakakuha gihapon og fire safety permit sa Bureau of Fire Protection ang mao nga establisimyento.
Ang nasangpit nga mall giingong wala mugana ang emergency alarm tungod deperensiyado na kini ug wala sab migana ang water springkler bisan og grabe na ang pagdilaab sa kalayo sa sulod sa mall.
Nakabantay na mga biktima dihang ma’y itum na nga aso misulod sa SSI room ug paggawas nila ngitngit na ang palibot tungod sa kagaba sa aso busa misuway sila og agi sa exit aron makagawas apan trangka kini.
Human sa walo ka bulan, ang Inter-Agency Special Investigation Task Force hingpit nang mipasaka og upat ka kasong kriminal batok sa 33 ka mga personalidad sa BFP Davao lakip pribadong indibidwal tungod sa anomaliya ug palpak nga pagluwas sa mga biktima nga natanggong sa ikatulong andana sa mall.
Apan alang ni Koinonia Theological Seminary (KTS) Registrar Pastora Joannee Dionaldo, dili pa niya masulti kung hingpit na bang nakab-ot sa mga kabanay sa 38 ka biktima sa nasunog nga NCCC Mall sa miaging tuig karon nga aduna nay mapatubag sa nadangatan sa mga biktima.
Katarungan ani, dili pareho ang pagbati sa mga kabanay lakip na sa dagan sa ilang huna-huna ilabi na kun mitisok og maayo sa kasing-kasing ang kasakit nga ilang gibati gumikan sa nahitabo sa ilang mga minahal sa kinabuhi.
Matud ni Pastora Dionaldo, ang gugma sa Dios ang gikinahanglan sa mga kabanay aron matambalan ang samad sa ilang mga kasing-kasing nga nagpasakit og maayo sa ilang mga pagbati.
Ug kung mahitabo kana, hayan makaingon na sila nga nakuha ug nadawat na nila ang hustisya alang sa mipanaw nilang mga minahal sa kinabuhi.
RadyoMaN Joel Viray
