Hustisya sa pagpamatay sa Marilog, gipanawagan kang FPRRD

Davao City – Mismong kang kanhi mayor ug kanhi Presidente Rodrigo Duterte na gipanawagan nga mahatagan og solusyon ang pagpamatay sa Barangay Baganihan, Marilog District, Davao City, diin bag-ohay lamang gipamusil-patay si Kagawad Joel Siawan ug Indigenous People’s Mandatory Representative (IPMR) Datu Ernesto Matalam niadtong Hulyo 1, 2023.

Sa interbyu sa DXDC RMN Davao kang Michael Siawan, igsoon ni Kagawad Joel, gawas sa NCIP-XI, sa kapulisan ug kang Davao City Mayor Sebastian Duterte, gipanawagan niya sa kanhi pamuno-nasud nga mahatagan og solusyon ug hustisya ang mga nagapanghitabo nga krimen sa lugar.

“Apil pud nako (nga ipanawagan) kang former President Rodrigo Duterte. Kabalo na man ka mayor sa Baganihan kung kinsa gyud ‘mi, kabanay Siawan nga miunong gyud pud sa imong pag-mayor dinhi sa Davao City. Mangayo gyud pud mi sa imuha og tabang, mayor kay dili na gyud lalim. Ug dili napud mi gusto pa nga madugangan pa ni nga problema. Ug unta, maundang na ang pagpamatay,” panawagan niini.

Panawagan usab sa igsoon ni Kagawad Siawan sa ilang ka-tribu sa Matigsalog nga maglig-on aron padayon nga maproteksyonan ang ilang ancestral domain.

RadyoMaN Kirby Manzon