Hydro Power Plant, Plano a Maipatakder iti ili a Vintar!

93

iFM Laoag – Kalikagom iti ZAK Green Energy Philippines ti mangipatakder ti Mini Hydro Power Plant iti ili ti Vintar, Ilocos Norte.

Ti nasao a proyekto ket aramatenna ti karayan iti passet ti Barangay Canaam iti nasao nga ili usar iti steel pipe wenu tubo aginggana iti power house. Daytoy a teknolohia ket iti “Diversion Type Hydro Plant” a kabaelanna a makaipaay iti 12 megawatts (MW).


Ti 12 megawatts (MW) ket posible a makaipaay iti kuryente ti umabot sangapulo a ribu (10,000) a pagtaengan iti maysa a lugar.

Segun ken ni Atty. Jingboy Atonen, Legal Counsel ti nasao a kompanya, umabot iti 1.5 billion a pisos ti masapol a pundo tapnu maileppas ti nasao a proyekto. Innayunna a dumanon ti lima (5) a tawen sakbay a makompleto daytoy.

Impasigurado met ni Engineer Warlito Ramos, Design Officer ti nasao a proyekto nga awan ti dredging wenu panagkali a mapasamak gapu ta narabaw laeng iti pannakaiplastarto dagiti tubo a mausar.

Kabayatanna, kaamak ni Bokal Atty. Saul Lazo ti posible a pannakaapektar dagiti agbibiag laeng nga umili iti karayan gapu ta maapektaran ti industria ti ikan iti nasao a proyekto.

Sinungbatan met ti nasao a kompanya nga aramidenda iti parebbenganda nangnangruna iti pannakatagiben iti aglawlaw ken kasta pay dagiti posible a maipaay a tulong kadagiti mangngalap iti nasao a lugar kas passetton iti ‘Corporate Social Responsibilities’da.’




Iti agdama, mannarimaanen ti koordinasyun iti Gobierno Probinsial ken iti Lokal ti pannakaadal a naimbag iti nasao a proyekto. Mangnamnama met ni Mayor Larissa Foronda a marugyananen iti ‘feasibility study’ sakbay nga agtuloy daytoy nasao a proyekto.

Bernard Ver, RMN News

Facebook Comments