Davao City – Husto ang Land Transportation Office (LTO) nga mas istriktohan pa ang pagkuha og driver’s license sanglit ang pagmaneho sa dalan dili kini katungod apan usa lamang ka talagsaong pribilehiyo nga gitagana ngadto sa mga dili abusador hinonoa responsable nga mga drivers.
Matud ni kanhi Inter-Agency Council for Traffic (I-ACT) Deputy Executive Director Elmer Organo, dalaygon ang lakang karon sa LTO nga hugtan pa ang proseso sa pagkuha og driver’s license aron mas plastado ang proseso sa paghatag og lisensya diin ngadto lamang kini itugyan sa mga aplikanteng responsable ug dili abusador samtang naglawig diha sa dalan.
Nabantayan ni Organo nga aduna gihapoy nakakuha og driver’s license nga wala muagi sa formal driving class mao nang bisan sa simple nga traffic signages, maglisod pa kini’g intepretar kun pagsabot hinungdan na hinoon sa mga disgrasya diha sa kadalanan.
Gibarugan ni Organo nga dili lamang sa driving class ang istriktohan apan lakip na ang pag-require og neuro-psychiatric examination aron masuta kun tarong ba or dili ang aplikante nga mohawid sa manibela.
Gidayeg sa kanhi I-ACT official ang Konseho ning syudad tungod sa pagduso og ordinansa nga magtratar nga usaka criminal offense ang pagpaneho nga walay lehitimong driver’s license.
RadyoMan Joel Viray
