Nagduda si Integrated Bar of the Philippines Misamis Oriental-Cagayan de Oro Chapter President Atty. Eddie Cuaresma sa kapas ni Majority Leader Vicente Sotto III isip bag-ong Senate President.
Gibutyag ni Atty. Cuaresma nga wala siya makaminus sa kapas ni Sotto, apan mas maayo matud pa nga usa ka abogado ug eksperto sa balaod ang gipuli kang Senador Koko Pimentel III.
Dugang pa sa maong abogado nga daghang hagit ug bug-at ang mga isyu nga atubangon sa Senado sama sa hisgutanan sa Bangsamoro Basic Law, Pederalismo ug ang Constitutional Convention.
Nagtoo si Atty. Cuaresma nga nadawat na ni Senador Koko Pimentel ang plano sa iyang mga kauban nga hulipan kini sa pwesto.
Kini tungod kay sa dili madugay, mobiya ra usab sa pagka-presidente si Pimentel, ilabina nga nagplano kining subling magpapili pagka-senador sa sunod nga tuig.
Dugang pa niini nga napasayo lamang ang pagbiya ni Pimentel sa pwesto ilabina nga sa Oktubre pa unta siya mokanaug isip Presidente sa Senado.
