Davao City – Humanon una ang imbestigasyon ayha nganlan sa publiko ang pangalan sa mga opisyal nga nalambigit sa anomaliya sa Social Amelioration Program sa Department of Social Welfare Development (DSWD).
Mao kini ang opinyon sa Integrated Bar of the Philippines (IBP) Davao City Chapter nga humanon una ang imbestigasyon adiser isapubliko ang mga pangalan sa mga nalambigit sa kurapsyon sa SAP.
Segun ni IBP-Davao City Chapter President Atty. Manceste Uy nga kon duna na’y resulta sa imbestigasyon dinha na nganlan sa publiko kung kinsa kining mga opisyal ang nagbinuang sa SAP.
Mas nindot usab matud pa kon masuta sa imbestigasyon kinsa kining mga opisyal nga walay puangod nagbuhat og anomaliya sa distribusyon sap dapat makasohan dayon.
Apan hangtud dili pa masuta kung kinsa ang mga nadilahig sa isyu mas maayo likayan una ang pagpubliko sa mga pangalan aron dili unfair sa uban nga dili makalingkawas sa asunto sa anomaliya sa SAP.
Hinoon may katungod ang publiko nga mahibalo sa kamatuoran apan gikinahanglan subayon kon tilukon una ang tanang ang proseso sa imbestigasyon aron ang manganlan kadto gayod nalambigit sa isyu sa SAP.
Busa gidasig ni Uy ang Department of Interior and Local Government (DILG) nga dalion og human ang ila nga imbestigasyon aron mapasakaan na dayon og kaso ang mga opisyal nga nagbinuang sa SAP.
RadyoMaN Joel Viray
