Davao City – Bisan pa man kun nabulit sa daghang kontrobersiya ang mga nag-unang programa ug promesa sa Duterte administration sama sa war on drugs, criminality and corruption nagmalaumon karon ang hut-ong sa mga abogado sa Davao Region nga mosangpot gihapon kini sa maayong nilugdangan.
Sa interview sa morning primetime radio social commentary program nga ‘Straight to the Point,’ gitataw ni Integrated Bar of the Philippines (IBP) Davao Chapter president Rogelio Largo nga angay gayud natong balansehon ang dagan sa mga critical campaigns sa Malacañang karon.
Matud ni Largo, subo hunahuna-on nga kinahanglan pang adunay 17 anyos nga Grade 11 student nga si Kian Loyd delos Santos mahunosan sa kinabuhi una pa nato maamguhan ang kagrabe kun ‘severity’ sa suliran sa droga.
Ang pangulo sa maong kahugpungan nagkanayun nga magsilbi unta nga hagit ngadto sa atong mga awtoridad nga sutao-on gayud ang kamatuoran sa Kian gunslaying incident, silotan ang angay silotan nga pulis ug nga dili kita mo-undang sa pagpangita sa mas maayo ug mas epektibong pamaagi kontra droga.
Angay usab konsiderahon nga challenge ngadto sa nasudnong kapulisan nga diha sa pagpatuman sa balaud, dili nila hikalimtan ang gipanudlo ngadto kanila nga due process of law, rule of law ug human rights sa tanan ilabi na sa mga sibilyan.
Sa nanggawas nga mga balita nga gilaraw karon sa pipila ka mga disgruntled police ug military officers nga molusad ug coup d’etat haron papha-on sa Palasyo si Pres. Rodrigo Duterte, si Largo nagtoo nga andam ang naulahi sa pagdepensa sa atong gobyerno, sa demokrasya ug sa mga ‘democratic institutions’ gikan sa kamot sa mga political saboteurs, anarchists ug mga agitators.
Nagtoo usab si Largo nga gumikan abogado ang atong pamuno-nasud, nasayud kini nga ang dissent kun kritisismo sa political opposition, mga human rights advocates, Catholic prelates ug uban pa tipik ug kabahin lamang sa ‘freedom of expression’ sa katawhan nga protektado mismo sa atong 1987 Philippine Constitution.
Kasamang June Duterte
